Laangjärege Präsident an aktive Musikant vun der Kënzeger Musik
No enger hefteger an heimtükescher Krankheet ass den Daniel Hautus
- e Kënzeger Jong duerch an duerch - den 7. Dezember 2010 am Alter
vun eréischt 49 Joer gestuerwen an huet virun allem
seng Mamm, seng Fra a seng zwee Kanner fir ëmmer verlooss. Dat
ganzt Duerf – säin Duerf – wuar geschockt vun där
schrecklecher Nochriicht, a seng vill Kollegen a Frënn konnten et
einfach net gleewen. Domadder hat kee gerechent, och wann gewosst war,
dat den Dan zënter e puer Méint gesondheetlech Problemer
hat.
Säi ganzt Liewen huet den Daniel zu Kënzeg verbruecht, an
deem Kënzeg un deem säin Härz houng. Hien ass do
opgewuess, huet als Kand do gewunnt an huet och do seng Famill
gegrënnt. No senger Schoul- a Militärzäit ass den Dan
beim Gesondheetsministère ugestallt ginn. Hei wuar hien vun
Ufank un e ganz beléifte Mataarbechter deen ëmmer
disponibel an immens hëllefsbereet war. Näischt wuar him do
ze vill – alles huet hien mat vill Begeeschterung matgemaach. Mee
esou wuar den Dan net nëmmen op senger Schaff. Mat vill Energie an
Engagement huet hien sech grad och op politeschem Plang joerelaang fir
d’Awunner aus senger Gemeng agesat. Den Dan ass ganz jonk an
d’Gemengepolitik gaangen, gouf schonns mat 27 Joer Conseiller,
koum an de Schäfferot an ass 10 Joer laang (1997-2007) mat
Läif a Séil Buergermeeschter an där Gemeng gewiescht
wou hien opgewuess ass. D’Gemengepolitik war iwwert déi
ganz Joeren seng grouss Passioun.
Seng aner grouss Passioun awer war säi Veräin,
d’Kënzeger Musik, wou hien schonns mat 9 Joer aktive Member
ginn ass an en Instrument geléiert huet. Am Joer 1985 ass hien
mat e puer Kollegen aus der Musik dem Komitee bäigetrueden an huet
ugefaangen Responsabilitéit am Veräin mat ze iwwerhuelen.
Ënnert der Presidentschaft vum Gilly Jeitz huet hien sech intensiv
an d’Veräinsféierung ageschafft an gouf 1990
Vizepresident. Hien huet direkt probéiert Afloss ze huelen an
huet versicht zesumme mat senge jonke Kollegen hier Visiounen am
Veräin ëmzesetzen. Wie kann sech net drun erënneren,
wéi si hire Courage an de Grapp geholl a ganz nei Weeër mam
„Fräschefest“ ageschloen hunn. A wéi dunn dee
Projet och nach grouss ageschloen ass, war dem Daniel seng Positioun op
sämtlechen Niveauen am Veräin konfirméiert. Et huet
dunn och keen iwwerrascht, wéi hien 1996 d’Presidentschaft
iwwerholl huet, an et huet keen drun gezweiwelt, datt dee positiven
Trend elo géing weidergoen. Iwwerzeegt dovunner, dat
d’Jugend d‘Zukunft vum Veräin wier, huet hien sech
intensiv fir d’Jugendaarbecht a fir eng Museksschoul am
Veräin agesaat.
Och um organisatoresche Plang huet den Dan permanent nei Iddien
entwéckelt an dobäi awer ni vergiess och Ureegungen vun
senge Matmemberen am Veräin opzegräifen fir dann am Team
déi Projet’en am Sënn vum Veräin ze
realiséieren. Et war och genau déi Zielstriewegkeet an
déi
Fàegkeet d’Fiedem ze zéien, déi dem
Veräin een enormen Opschwong bruecht hunn. Seng
onkomplizéiert Art a Weis, seng Charakterstärkt an
Ausdauer, seng Kollegialitéit a seng Omnipräsenz op
sämtleche Gebidder vum Veräin waren et déi eis
alleguer motivéiert hunn mat no vir ze goen an esou zesummen op
een Niveau ze kommen, deen Sengesgläichen sicht.
Besonnesch agesat huet den Dan sech awer och joerelaang fir déi
aus dem Jumelage mat Gaflenz an Eisterräich entstane
Frëndschaft tëschent de Leit aus den zwou Gemengen ze
festegen an auszebauen. Seng Impulser hunn derzou gefouert, dass duerch
dës déif Frëndschaft dem Veräin op kulturellem an
op gesellschaftlechem Plang nei Dieren opgaang sinn. Wat hu mir
formidabel Momenter zesummen mat eisen éisträicheschen
Frënn erliewt - an dat alles ënnert der Regie vun eisem
Präsident, dem Dan!
Och wéi d’Musek an d’Pompjeeën 2005 hier 100
Joer konnte feieren, war den Dan omnipräsent – als
Buergermeeschter op der Gemeng an als Präsident am Veräin
– an huet all nei Iddi mat grousser Begeeschterung voll
ënnerstëtzt. Ëmmer konsensbereet, dat wuar seng ganz
perséinlech Stäerkt. Mënschlechkeet a Respekt virun
deene anere Leit, dat alles waren Wäerter fir déi den Dan
agestanen ass. An dach: näischt wuar him méi wichteg
ewéi seng Famill, en harmonescht Liewen doheem mat enger
staarker Fra u senger Säit a Kanner déi dem Dan ganz vill
Freed a Satisfaktioun am Liewen bruecht hunn.
Grad well mir hien elo iwwerall esou immens vermëssen, si mär
him et schëlleg a sengem Geescht a mat senger Energie weider ze
fueren.
Eent ass op jidder Fall sécher. Den Daniel huet an eisem
Veräin eng Eiereplaz verdéngt a keen, deen hien kannt huet,
wäert hien jee vergiessen. Niewent dem Brigitte, dem Lynn, dem
Jérôme a der ganzer Famill, wäerten och d’Leit
aus der Gemeng Këinzeg a ganz besonnesch seng vill Frënn aus
der Musek den Dan als immense Kärel mat deem een duerch Deck an
Dënn konnt goen, als gudden an humorvolle Mënsch, als
virbildlechen a grondéierleche Gemengepolitiker, als dynameschen
a enthousiastesche Veräinspresident vermëssen an hien nach
ganz laang an allerbeschter Erënnerung behalen.
Fir och senger léiwer Fra, senge Kanner an senger Famill eis
Sympathie an eist déift Matgefill ze beweisen, spille mir den
30. Abrëll eise Gala-Concert als Hommage un den Daniel. Mär
wäerten all eis Energie dru setzen fir dësem Concert ee
besonnesche Stempel opzedrecken.
